Gjykata Kushtetuese e ka shpallur të pavlefshëm Ligjin për Masat e Përkohshme të Produkteve Themelore në Raste të Veçanta të Destabilizimit në Treg, raporton teve1.info
Sipas njoftimit publik të Gjykatës, masat e përcaktuara me këtë ligj nuk janë në përputhshmëri me paragrafin 1 të nenit 7 [Vlerat], nenin 10 [Ekonomia] dhe paragrafin 5 të nenit 119 [Parimet e Përgjithshme] të Kushtetutës së Republikës së Kosovës.
“Ligjit nr. 08/L-179 për Masat e Përkohshme të Produkteve Themelore në Raste të Veçanta të Destabilizimit në Treg, nuk është në përputhshmëri me paragrafin 1 të nenit 7 [Vlerat] dhe paragrafin 1 të nenit 119 [Parimet e Përgjithshme] të Kushtetutës së Republikës së Kosovës; (iv) të shpallë të pavlefshëm, me shtatë (7) vota për dhe një (1) kundër, në tërësinë e tij, Ligjin nr. 08/L-179 për Masat e Përkohshme të Produkteve Themelore në Raste të Veçanta të Destabilizimit në Treg; dhe (iv) të refuzojë, njëzëri, kërkesën për masën e përkohshme”, thuhet në njoftim.
Lidhur me këtë vendim ka reaguar deputeti i Lidhjes Demokratike të Kosovës, Besian Mustafa i cili e kishte dorëzuar ankesën në Kushtetuese së bahsku edhe me deputetë të tjerë.
Mustafa në profilin e tij në Facebook ka shkruar se sot Gjykata tregoi se kush po tenton ta mbroj e kush ta shkatërroj Kushtetutën.
“Bashkë me Driton Selmanaj e patëm dërguar në Gjykatë Kushtetuese tentimin e kësaj Qeverie për ta shkelur Kushtetutën. Sot, Gjykata tregoi qartazi se kush e mbron Kushtetutën, vet shtetin e Kosovës e kush, në anën tjetër, po punon ta shkatërrojë.
Mirëpres tash akuzat e Hekuranit, Rozetës dhe Albulenës se Gjykata është e kapur. Para dy ditëve vet këta mburreshin me vendimin e po kësaj Gjykate. Praktikantë hesapi”, ka shkruar Mustafa.
Neni 5 i këtij projektligji, pika 1 parasheh masat mbrojtëse për furnizimin me produkte themelore të cilat janë:
1.1. kufizimi i sasisë që i shitet konsumatorit brenda periudhës së caktuar;
1.2. ndalimi i largimit nga shitja e produktit;
1.3. caktimi i marzhës tregtare për shitjen me shumicë dhe pakicë;
1.4. caktimi i çmimit maksimal të lejuar;
1.5. detyrimi i operatorit ekonomik për të ruajtur pjesën e caktuar të stokut të produktit;
1.6. detyrimi i operatorit ekonomik për t’u furnizuar dhe për të ofruar për shitje produktet themelore si para caktimit të masave mbrojtëse;
1.7. ndalimi, kufizimi i eksportit;
1.8. masat e tjera të përcaktuara me vendim të Qeverisë, me qëllim të mbrojtjes së konsumatorit.
Ndërsa, produktet themelore të përcaktuara me këtë Ligj ishin
1.1. Drithërat;
1.2. Miell gruri;
1.3. Buka;
1.4 Orizi;
1.5. Pastat;
1.6. Vaji ushqimor i lulediellit;
1.7. Qumështi;
1.8. Kripa e kuzhinës;
1.9. Vezë pule;
1.10. Mishi i pulës;
1.11. Sheqeri kristalor;
1.12. Produktet e higjienës personale;
1.13. Lëndët e drurit për djegie
