Nga viti 2018-të është pjesë e Gjykatës Kushtetuese të Republikës së Kosovës.
E shtatë vite pas, çështja e emërimit të gjyqtarit Radomir Llaban është kthyer në qendër të vëmendjes.
Ai po konsiderohet i rrezikshëm për sigurinë kombëtare nga e para e shtetit, Vjosa Osmani.
Televizioni ka kërkuar një përgjigje nga Presidenca e Kosovës se a kanë bërë ndonjë hap konkret për të kërkuar hetim për gjyqtarin Laban, por të njëjtit kanë thënë se nuk kanë përgjigje shtesë përveç asaj që është thënë në konferencë të martën.
Por njohësit e çështjeve juridike thonë se Osmani ka pasur mundësi të vërtetoj nëse Laban është i rrezikshëm për rendin kushtetues apo jo.
Avokati Anton Ndrecaj tregon se janë disa mënyra për të iniciuar rast për shkarkimin e secilit zyrtarë.
Njëra prej mundësive është ti drejtohen Prokurorisë Speciale.
Tëvë1 ka kërkuar nga Prokuroria Speciale nëse kanë marrë kërkesë për hetim ndaj Radomir Llaban, por të njëjtit nuk kanë kthyer përgjigje.
E Ambasada e Britanisë së Madhe në Kosovë ka bërë thirrje që pavarësia dhe vendimet e Gjykatës Kushtetuese në Kosovë të respektohen.
“Gjykata Kushtetuese e Kosovës ka procedura të përcaktuara mirë për shqyrtimet dhe vendimet e saj. Aftësia e Gjykatës për të funksionuar në mënyrë të pavarur është jetike për demokracinë e Kosovës. Kjo duhet të respektohet dhe promovohet nga të gjitha palët dhe vendimet e Gjykatës të respektohen dhe zbatohen”, thuhet nga ambasada.
Televizioni ka kërkuar një qëndrim edhe nga Gjykata Kushtetuese mirëpo të njëjtit nuk kanë kthyer përgjigje.
