Deklaratat e kryeministrit të Shqipërisë, Edi Rama në foltoren e Kuvendit të Kosovës, nuk u panë fortë të duhura nga analisti, Aleksandër Çipa në Tiranë.
Çipa tha se kritikat e Ramës nuk janë të hijshme pasi Kurti të njëjtën gjë nuk do ta bënte po të ishte në Kuvendin e Shqipërisë.
“Të dy kryeministrat në takimin e sotëm dhe sidomos në ligjërimin që mbajtën në foltoren në Kuvendin e Kosovës mbetën besnik të karakteristikave individuale të tyre në politik-bërje. E para që zoti Rama që thyen tabu apo mbetet personi anti tabu duke cenuar edhe në pikëpamjen etike si mysafir atë kritikën drejtuar zotit të shtëpisë në rastin konkret Albin Kurtit. Padyshim që nga karakteri zoti Kurti një gjë të tillë nuk do ta bënte nëse do të ishte vizita ndryshe”, tha analisti nga Shqipëria, Aleksandër Çipa.
Ndërsa analisti Berim Canaj, thotë se në këtë seancë përmes fjalimeve tentohej të shpërfaqej një emocion.
“Është mirë që së paku kuvendi apo kuvendarët janë në këtë takim që ta dërgojnë një mesazh të popullata dhe te qytetarët edhe të Kosovës edhe të Shqipërisë që njëfarë forme e kanë një rrugëtim të përbashkët. I pamë edhe fjalimet e pamë që tentohej të shpërfaqej pak a shumë një emocion si nga ana e Kosovës për Shqipërinë dhe anasjelltas”, tha Canaj.
Ai komentoi edhe deklaratën e Ramës ku përmendi ish-krerët e UÇK-së që po gjykohen në Hagë.
“Ai e din që nga Kurti nuk e besoj që do të vijë një nismë e tillë për shkak të ambicieve politike të cilat i ka Kurti për shkak se po shihet se kthimi i krerëve në Kosovë natyrisht shumë akterë politik në skenën politike i shohin si rrezik”, tha ai.
Mos pajtime mes të dy kryeministrave Rama dhe Kurti ka pasur edhe në të kaluarën.
