Sulmin terrorist në Banjskë, e hetoi nga fillimi e deri në fund.
Prokurori special, Naim Abazi ngriti aktakuzë ndaj 46 personave, ku ndaj dy prej tyre u shqiptua dënim i përjetshëm.
Abazi, i ka hyrë garës për Kryeprokuror të shtetit.
Pozitën e njëjtë, Prokuror special në Departamentin për hetimin e korrupsionit dhe krimit financiar, e mban edhe Rafet Halimi.
Edhe ky po synon postin më të lartë të Sistemit prokurorial.
Një ndër rastet që ai ka hetuar është i njohur me emrin “Subvencionet.”
Kundërkandidatë, këta do ta kenë një koleg tjetër nga Prokuroria Speciale.
Atdhe Dema, nga Departamenti për hetimin e terrorizmit, ka aplikuar po ashtu për t’u zgjedhur Kryeprokuror i shtetit.
Punën si Prokuror ai e nisi para 12 vitesh, ku hetoi krime të luftës, krim të organizuar e korrupsion.
Në mesin e këtyre rasteve ishin afera e hidrocentraleve, e “53 milionëshi”.
Garës për Kryeprokuror të shtetit i ka hyrë edhe Shqipdon Fazliu, Prokuror në Zyrën e Kryeprokurorit të Shtetit.
Për këtë pozitë ai kishte aplikuar edhe herën e kaluar, ku e kishte sfiduar në Gjykatë Supreme kushtetshmërinë e procesit, ku Blerim Isufaj u propozua për kryeprokuror të shtetit.
Në listën e kandidatëve, bën pjesë edhe Kryeprokurori i Prokurorisë Themelore në Prishtinë, Zejnullah Gashi.
Ai fillimisht kishte qenë pjesë e sistemit gjyqësor, njëherë si Gjyqtar në divizionin për kundëvajtje, pastaj në divizionin penal.
Sistemit prokurorial i është bashkuar nga viti 2015, kurse nga viti 2023 ka pozitën që e mban edhe sot.
Afati i aplikimit për Kryeprokuror të shtetit ka përfunduar më 10 qershor.
E tani kërkohet që Këshilli Prokurorial të zhvillojë në mënyrë transparente procesin e përzgjedhjes së kësaj pozite.
“Është e domosdoshme që ta kemi një Kryeprokuror të shtetit, pasi Kosova ka vite që nuk nuk ka Kryeprokuror të shtetit. Dhe çfarë është shumë e rëndësishme është që procesi të jetë meritor, objektiv dhe të jetë transparent. Në të kundërtën është shumë rrezik që mos ta kemi një proces me integritet”, tha Gzim Shala nga IKD.
Këshilli Prokurorial vendosi që të hapet konkurs i ri për Kryeprokuror të shtetit, për çka Kryeprokurori i Prokurorisë Speciale kishe paraqitur padi me kërkesë për masë të sigurisë në Gjykatën Adminsitrative, duke kërkuar që ky konkurs të pezullohej, por që Gjykata e kishte refuzuar.
