Votimi pro ose kundër i largimit të kryetarëve aktual shqiptar në veri u bojkotua nga qytetarët serbë atje. Njohësit e politikës thonë se në këtë mes nuk ka fitues por humbësit e vërtetë janë qytetarët serbë që u përdorën nga Beogradi.
Të dielën e 21 prillit, 267 persona iu drejtuan kutive të votimit në katër komunat veriore të vendit.
Mirëpo të drejtë vote në Mitrovicën e Veriut, Leposaviqit, Zvecanit dhe Zubin Potokut patën 46 mijë e 556 persona.
Pjesa më e madhe e serbeve lokal në këto katër komuna e bojkotuan këtë proces të cilin vet e kërkuan.
E ky numër i vogël i daljes për votim po konsiderohet dështim.
Njohësi i çështjeve politike, Blerim Canaj këtë situatë po e sheh si shfrytëzim politik nga ana e Kosovës dhe Serbisë.
Humbësit më të mëdhenj në këtë mes po i sheh qytetarët serbë analisti politik Fidan Ukaj.
Sipas Ukajt, ata po shfrytëzohen nga Beogradi.
“Humbës në këtë proces ose në këtë mundësi për të ndërruar qeverisjen në katër komunat janë vetë qytetarët serbë të asaj pjese për shkak të dendësisë e po ashtu shumicës të cilët janë nga komuniteti serb të asaj pjese. Mendoj se udhëzimi administrativ që Qeveria e Kosovës e dha për qytetarët e asaj pjese nuk u shfrytëzua, po ashtu u digju zani i arteries së Beogradit në Kosovë – Listës Serbe për me e bojkotu këtë proces zgjedhor. Mendoj se është një humbje e madhe për qytetarin serb”, tha njohësi i politikës, Fidan Ukaj.
Pas përfundimit të këtij procesi, drejtori ekzekutiv i Institutit Demokratik të Kosovës, Ismet Kryeziu ka thënë se ky bojkot i serbëve në veri është protestë politike.
E duke u bazuar në rezultatet e Komisionit Qendror të Zgjedhjeve shumica e votave ishin kundër largimit të kryetarëve aktualë nga pozitat e tyre.