Nominimet për çmimet Golden Globe do të shpallen të hënën, duke shënuar zyrtarisht nisjen e sezonit të çmimeve të filmit dhe televizionit në Hollywood, i cili do të kulmojë me Oscarët në muajin mars.
Në mesin e filmave që pritet të jenë në garë këtë vit janë Wicked: For Good, Avatar: Fire and Ash, Hamnet, Marty Supreme dhe Sinners, ndërsa në kategoritë e aktrimit përmenden emra të mëdhenj si Timothée Chalamet, Emma Stone, Leonardo DiCaprio, Jessie Buckley, Sydney Sweeney dhe Dwayne Johnson.
Ndërkohë, Golden Globes do të njohë edhe krijimet televizive, ku vëmendja pritet të jetë e përqendruar te seriali britanik Adolescence, i cili shkëlqeu edhe në ndarjen e çmimeve Emmy.
Krahas tij, seriale si The White Lotus, Severance, Slow Horses, The Pitt dhe Abbott Elementary pritet të jenë në konkurrencë të fortë në kategoritë për dramë dhe komedi.
Një risi këtë vit është përfshirja e një kategorie të re për podcastin më të mirë, shkruan BBC. Ceremonia e Golden Globes do të mbahet më 11 janar në Los Angeles dhe do të prezantohet nga komedianja amerikane Nikki Glaser, e cila rikthehet pas suksesit të madh të vitit të kaluar.
Golden Globes mbetet një nga ndalesat më të rëndësishme në rrugën drejt Oscarëve, ku fituesit shpesh marrin vëmendje dhe mbështetje të shtuar nga industria e filmit.
