Kryetarja e grupit parlamentar të Lëvizjes Vetëvendosje, Mimoza-Kusari Lila ka mohuar se në publikimin e audi-incizimit me Millan Radojiçiq, ka biseduar për votimin e ligjit për Pagën Minimale. Por ndryshe mendojnë partitë opozitare, PDK dhe AAK. Sipas tyre, është cenuar siguria nacionale.
Përgjimi i një bisede të kryetares së grupit parlamentar të VV-së, Mimoza Kusari Lila me kryeterroristin, Milan Radojiçiq ishte kryetemë në Kuvend.
Para fillimit të seancës, përfaqësues të opozitës kritikuan ashpër partinë në pushtet.
“ Na u është cenuar siguria kombëtare, pra ne nuk e dimë se cilat janë çështjet të cilat i ka shty Millani të tjerat, cilat janë çështjet që Mimoza i ka shty bashkë me ta prandaj mendoj se mbi këto çështje duhet me hedh dritë ju e dini që Mimoza Kusari Lila ka pas deklarata krejt ndryshe edhe në të kaluarën deri sa kanë dalë fakte të reja”, tha Abelard Tahiri nga PDK.
“ Dy të vërteta vetëm se dihen, në parlamentin e Kosovës, Lëvizja Vetëvendosje dhe Lista Serbe pra kanë votuar bashkë, ligjin për Pagën Minimale pra e kanë bashkuar votën për mos me i përfshi veteranët e Ushtrisë Çlirimtare të Kosovës… Poashtu një e vërtetë tjetër është se për këtë votë shefja e grupit parlamentar të VV-së pra të spihuni kryeministrit spiun të Serbisë e ka bashkuar votën dhe ka bërë bisedë mbrapa shpinës së Kosovës”, u shpreh Ramush Haradinaj.
Por këto akuza i kundërshtoi vet Mimoza Kusari-Lila.
“Asnjë komunikim nuk ka qenë me Listën Serbe për ligjin për Pagën Minimale, rrjedhimisht incizimet e mbrëmshme janë të fabrikuara për të cilat unë sot kam qenë në policinë e Kosovës dhe Prokurori dhe për to do të vazhdoi rasti i cili i bashkëngjitet rastit të vitit të kaluar kam dorëzuar kallëzim penal për ish-deputetin, Sllavko Simiq”, tha Kusari-Lila.
Megjithatë se ka folur me Millan Radojiciq, Kusari-Lila e pranoi por që sipas saj, biseda është bërë në gjuhën shqipe.
