Shefja e Grupit Parlamentar të Lëvizjes Vetëvendosje, Mimoza Kusari-Lila ka folur për mosrealizimit të një takimi mes kryeministrit të Kosovës, Albin Kurti me sekretarin e ShBA-së, Antony Blinken në kuadër të takimeve në Konferencën e Sigurisë në Mynih.
“Ne e kemi parë që Kosova ka qenë prej ditës së parë atje, këtu kemi pasur festën e 15-vjetorit të Pavarësisë së vendit, gjithashtu edhe angazhimin e presidentes dhe kryeministrit në funksione shtetërore. Pastaj në të njëjtën ditë kur ata kanë arritur në mbrëmje zoti Blinken është larguar nga aty për udhëtimin në Turqi dhe për të tjerat detaje unë nuk kam, sepse nuk kam qenë pjesë e protokollit të pjesëmarrjes në Konferencë të Mynihit”, ka thënë Lila në emisionin “ResPublika” në Tëvë1.
Tutje, ajo ka thënë që takimet dhe prezantimet e krerëve të lartë të Kosovës kanë qenë maksimale.
“E di se të gjitha takimet dhe prezantimi i tyre që është bërë mund të flitet për një angazhim maksimal edhe të presidentes edhe të kryeministrit, zëvendëskryeministrit dhe ministres së Jashtme në kontaktin dhe komunikimin për Kosovën prej përfaqësuese të lartë të NATO-s te kryeministrat e Bashkimit Evropian, kryeministrit të Suedisë, si kryesuese e presidencës së BE-së”, tha ajo.
Gjithashtu, shefja e Grupit Parlamentar të VV-së tha se duhet të jenë të qetë të gjithë ata të mundohet të nxjerrin diçka për mos takimin e kryeministrit Kurti me sekretarin Blinken.
“Duhet të jenë të qetë të gjithë ata që mundohen të nxjerrin diçka në raport me këtë mos takim, po ajo çka u pa, u pa se ka pasur angazhim maksimal për aq kohë sa kanë arritur të qëndrojnë për shkak të një përvjetori jubilar-15 vjetorit të shënimit të pavarësisë këtu në Prishtinë”, deklaroi ajo.
