Kusari-Lila tha se në mbledhje kanë qenë dy përfaqësues të LVV-së në mënyrë që t’ua mundësojnë kuorumin për ta marrë në intervistë Berishajn, raporton teve1.info
Në seancën që po mbahet në Kuvend, ajo u tha deputetëve se pozita e ka mundësuar punën e Komisionit, e jo të kundërtën ta ndalojë atë.
“Ata të cilët kanë bërë konferencë për media me thanë se na po dojmë me parandalu, ju inkurajoj publik, opinion, të gjithë që dojnë të analizojnë, merrni lexoni transkriptën e intervistimit të ambadorit Berishaj në Komision Hetimor. Dy përfaqësues i kemi pasë për me ju mundësu kuorumin juve që me marr në intervistë ambasadorin. Dy përfaqësues të Grupit Parlamentar të LVV-së, kanë qenë aty që ju me bo pyetje. Ju keni bo pyetje, edhe çka ka dalë prej pyetjeve, zero. E tash çka na akuzoni neve, silleni raportin në Kuvend. Raporti vjen pa rekomandim të Komisionit, por vjen në Kuvend”, tha ajo.
Deputetja Kusari-Lila deklaroi se nuk kanë bërë as përpjekjen më të vogël që ta ndalojnë raportin e as intervistimin e ambasadorit Berishaj.
“Krejt i keni pas përpara, me të gjitha mundësitë ju nuk po mundeni me nxjerr argumentin e juaj. Se argumenti i juaj i vetëm është kundër qeverisë Kurti e jo për të vërtetën dhe drejtësinë”, potencoi ajo para deputetëve në Kuvend.
Në mediat sllovene është raportuar se ambasadori Berishaj ishte përfshirë në afera pastrimi parash.
Sipas raportimeve, një kompanie të tij në Mal të Zi i janë bartur afro 600 mijë euro nga dega e kompanisë GEN në Beograd, e më pas ato i janë dhënë kesh politikanit slloven Robert Golob. Ambasadori Berishaj i ka mohuar të gjitha këto. /Teve1.info/
