Ministrja e Industrisë, Tregtisë dhe Inovacionit, Mimoza Kusari-Lila, në seancën e jashtëzakonshme të Kuvendit deklaroi se ulja apo heqja e TVSH-së dhe akcizës për derivatet e naftës nuk do të sillte përfitime për konsumatorët, por do të ndikonte kryesisht tek operatorët e tregut.
Ajo iu drejtua deputetëve të opozitës duke rikujtuar një përvojë të mëhershme, duke theksuar se një masë e tillë është testuar dhe nuk ka dhënë rezultat në uljen e çmimeve për qytetarët.
“Ka ndodhur edhe një ulje e TVSH në qeverinë Mustafa më 2016 nga 18 në 8 për qind. Cili është bërë vlerësimi, a ka pasur të produkteve, jo. Ju e keni testuar të njëjtin propozim që po e sillni. D.m.th. ulja e TVSH-së ka treguar dy herë tashmë se nuk e ulë çmimin që qytetari që e blen në fund produktin do ta paguajë të njëjtin çmim”, ka thënë ajo.
Kusari-Lila theksoi se të hyrat nga akciza përbëjnë një pjesë të rëndësishme të buxhetit të shtetit dhe përdoren për financimin e masave mbështetëse për qytetarët.
Sipas saj, heqja e akcizës do të krijonte mungesë të madhe të të hyrave buxhetore, duke rrezikuar programe të rëndësishme sociale, përfshirë mbështetjen për lehonat, fëmijët dhe pakot për përballimin e inflacionit.
“Të hyrat e akcizës për buxhetin e shtetit janë afër 450 milionë euro, nënkuptojnë se në rast të heqjes së akcizës janë mangu 450 milionë euro vjetore, mujore 33 milionë euro. Nëse heq 20 cent nga 37.5 cent nga akciza për derivate i bie afër 20 milionë euro. Ndërsa në projeksionet për rritjet buxhetore është paraparë rritja e shtesave për lehona, për fëmijë, mbrojtja e qytetarëve me pakot për ballafaqimin e inflacionit. Çka po propozoni? Të heqim akcizën. Të ulim TVSH-në dhe cilën ta heqim prej masave. Këto të dyja në burim ndikojnë drejtpërdrejt vetëm tek operatorët”, tha ajo./teve1.info/
