Shefja e Grupit Parlamentar të LVV-së, Mimoza Kusari-Lila, tha sot se Kuvendi e ka harruar funksionin e vetë në procese të votimit.
Këtë deklaratë, ajo e bëri pasi PDK kërkoi debat parlamentar në lidhje me të gjeturat e raportit të DASh-it.
Ajo tha se Kuvendi duhet që të i kthehet votimit për marrëveshjet ndërkombëtare, ndërsa për raportin të diskutohet një ditë tjetër.
“Ky kuvend, përveç debate, fyerje, ofendime apo akuza e kundërakuza, e ka harruar funksionin e vetë në procese të votimit, sot kemi marrëveshjet ndërkombëtare për të cilat kemi bërë apele disa herë te të gjitha partitë. Është mirë të i kthehemi kësaj agjende e cila është miratu në kryesi… Pastaj një ditë tjetër caktojmë seancë për raportin e DASH-it”, tha ajo.
Shefi i Grupit Parlamentar të PDK-së, Abelard Tahiri, propozoi që debati të futet në pikan 4 të rendit të ditës, por kundër këtij propozimi votoi LVV.
“Unë po kërkoj që debati parlamentar për raportin e DASH-it të futet në pikën 4 të rendit të ditës, pra pas miratimit të procesverbaleve nga seancat e mëparshme, pas deklarimeve jashtë rendit të ditës dhe pyetjeve parlamentare të futet debati parlamentar”, tha Tahiri.
Rreth këtij propozimi 26 deputetë votuan për, 40 kundër dhe 1 abstenim./teve1.info
