Bllokuesit e konstituimit të Kuvendit të Kosovës janë partitë që deri tani ishin në opozitë, tha kryetarja e Alternativës, Mimoza Kusari-Lila.
Kusari-Lila, e cila është pjesë e koalicionit me Lëvizjen Vetëvendosje, tha se ata po e shfrytëzojnë të drejtën kushtetuese për zgjedhjen e kryetarit të Kuvendit, ndërkaq partitë të tjera po mbajnë qëndrime politike duke mos kontribuar në zgjidhjen e ngërçit në legjislativ.
“Në rrethanat që jemi, bllokuesit e vetëm janë partitë që nuk marrin pjesë në votim. Mbi të gjitha që nuk asnjë perspektivë mbi atë që se si mund të shkojë ky proces, në kohën kur fillimisht kanë deklaruar siç ishte rasti me kryetarin e LDK-së, Lumir Abdixhiku që mezi presin që të bëhet konstituimi i Kuvendit. Ndërsa aktualisht kanë qëndrimin se nuk marrin pjesë në votim për asnjë kandidat të LVV-së, partisë që i takon kryetari i Kuvendit. Në anën tjetër, partitë të tjera kanë prezantuar qëndrime të ndryshme selektive në raport me zgjedhjen tonë. Ne po prezantojmë një të drejtë tonën kushtuese ndërsa ata po prezantojnë qëndrime politike”, tha ai.
Duke folur për kërkesën që vazhdimi i seancës konstituive të mbahet një herë në javë dhe jo çdo 48-orë siç parashihet në Rregulloren e Kuvendit, Kusari-Lila tha se një gjë e tillë është propozuar meqenëse është rasti në Gjykatë Kushtetuese dhe s’ka lëvizje të qëndrimeve nga partitë politike në Kuvend.
“Nuk është se kemi hezituar të vijmë çdo 48-orë. Ne kemi propozuar që nëse s’ka lëvizje nga qëndrimet e tyre a do të pajtoheshin me shmangie të procedurës. Shmangia është e përcaktuar edhe me rregullore me dy të tretat e deputetëve”, shtoi ajo.
Më 21 maj dështoi për herë të nëntëmbëdhjetë konstituimi i Kuvendit të Kosovës.
