Zyra e Kryeministrit ka njoftuar se gjatë takimit me drejtuesit e kësaj shkolle, Kurti ka vlerësuar përkushtimin dhe përpjekjet e mërgatës për ruajtjen e gjuhës dhe kulturës shqipe.
“Rëndësia e mësimit të gjuhës shqipe për integrim pa asimilim u theksua në vizitën e Kryeministrit të Republikës së Kosovës, Albin Kurti, në shkollën shqipe “Alba Life” që operon në të gjitha lagjet e Nju Jorkut.Në takimin e përbashkët me zëvendësministren e Punëve të Jashtme dhe Diasporës, Liza Gashi dhe me themeluesit e drejtuesit e kësaj shkolle, Kryeministri Kurti vlerësoi përkushtimin dhe përpjekjet e mërgatës për ruajtjen e gjuhës dhe kulturës shqiptare ndër breza dhe edukimin e gjeneratave të reja”, thuhet ndër tjerash në njoftim.
Tutje, Kurti ka konfirmuar angazhimin e Qeverisë së Kosovës për shkollën shqipe në vendet ku jeton mërgata dhe se këtë të fundit e ka vlerësuar si faktor për zhvillimin e vendit.
“Themeluesi i shkollës, z.Qemal Zylo foli për kontributin e këtij institucioni për zhvillimin dhe ruajtjen e identitetit kombëtar përmes mësimit të gjuhës, kulturës së origjinës si dhe njohjes me trashëgiminë kombëtare shqiptare. Ai bëri të ditur se programet e shkollës mbështeten në programet e përgatitura nga Ministria e Arsimit të Shqipërisë dhe Ministria e Arsimit, Shkencës, Teknologjisë dhe Inovacionit të Kosovës”, thuhet ndër tjerash në njoftim./teve1.info/
