Sipas komunikatës së lëshuar nga Zyra e Kryeministrit, shkolla do të jetë me sipërfaqe afër 3 mijë metra katrorë dhe kap vlerën e 1,2 milionë eurove.
Kryeministri Kurti theksoi se Qeveria mbetet e përkushtuar për projekte të reja sikurse ky.
“Deri në fund të vitit, çerdhet do të hapen edhe në Prizren e në Suharekë, ndërkaq, në vazhdën e këtyre punimeve për ndërtimin dhe adaptimin e hapësirave pritet të bëhen çerdhe edhe në Junik, Skenderaj, Obiliq, Pejë, Prishtinë, Gjilan, Ferizaj, Shtime dhe Malishevë”, thuhet në komunikatën e Qeverisë.
Ndërsa, sa i përket projektit për ndërtimin e çerdhes në lagjen Rezinë të Gjakovës, Kurti tha se ky projekt është shumë i rëndësishëm për shkak se të gjitha studimet kanë treguar që suksesi në shkollat fillore është i lidhur drejtpërsëdrejti me suksesin që kanë treguar fëmijët në shkollimin parashkollor, pra çerdhe.
“Edukimi parashkollor është vendimtar për suksesin e mëtutjeshëm në arsimimin e fëmijëve dhe të rinjve” u shpreh ai.
Objekti i filluar të mërkurën pritet t’i ketë njëmijë e katërqind metra katror dhe është i planifikuar për 150 fëmijë.
Ky projekt kap vlerën e rreth 760 mijë eurove.
Të dy projektet janë investim i Ministrisë së Arsimit, Shkencës, Teknologjisë dhe Inovacionit.
