Kryeministri në detyrë i Kosovës, Albin Kurti, ka uruar Shtetet e Bashkuara të Amerikës me rastin e Ditës së Pavarësisë, duke e cilësuar këtë ditë si simbol të lirisë, barazisë dhe demokracisë për mbarë botën.
Përmes një postimi në profilin e tij në Facebook, Kurti i ka uruar në veçanti presidentin amerikan Donald J. Trump dhe të gjithë qytetarët amerikanë për 249-vjetorin e shpalljes së pavarësisë së SHBA-ve.
“Sot, në ditën kur Shtetet e Bashkuara të Amerikës hyjnë në vitin e 250-të të ekzistencës së tyre, i uroj presidentit Donald J. Trump dhe të gjithë popullit të SHBA-ve gëzuar Ditën e Pavarësisë!”, ka shkruar Kurti.
Ai ka theksuar rëndësinë e idealeve të Deklaratës së Pavarësisë së vitit 1776, që sipas tij mbeten po aq të rëndësishme sot, sidomos në kohë sfidash për paqen dhe sigurinë ndërkombëtare.
Kryeministri në detyrë ka shprehur mirënjohje për miqësinë dhe partneritetin mes Kosovës dhe SHBA-ve, duke përmendur disa nga fushat ku ky bashkëpunim është thelluar, si:
Zhvillimi i kapaciteteve të Forcës së Sigurisë së Kosovës (FSK)
Mbështetja për Ukrainën ndaj agresionit rus
Strehimi i refugjatëve afganë dhe të tjerëve në Kosovë
“Në emër të Republikës së Kosovës, gëzuar ditëlindjen e 249-të SHBA-ve dhe të gjithë amerikanëve! Qoftë e përhershme aleanca e dy shteteve tona dhe miqësia e ngushtë e popujve tanë”, përfundoi Kurti.
