Kryeministri në detyrë dhe njëherësh kryetar i Lëvizjes Vetëvendosje, Albin Kurti, ka uruar bashkëpunëtoren e tij politike, Mimoza Kusari-Lilën, për përvjetorin e tetë të themelimit të partisë Alternativa.
Përmes një postimi në rrjetet sociale, Kurti theksoi bashkëpunimin shumëvjeçar me Kusari-Lilën, duke përmendur se kanë garuar në katër palë zgjedhje dhe kanë qeverisur bashkë për katër vjet.
“Bashkë garuam në katër palë zgjedhje, e qeverisëm bashkë për katër vjet. Urime përvjetori i 8-të i themelimit të Alternativës! Bashkë, vazhdojmë”, ka shkruar Kurti, duke shpërndarë edhe postimin e Kusari-Lilës.
Kreu i VV-së ka marrë pjesë edhe në ceremoninë e organizuar nga Alternativa me rastin e këtij përvjetori.
Ky përvjetor shënon tetë vite nga themelimi i Alternativës, partisë që drejtohet nga Mimoza Kusari-Lila dhe që prej disa vitesh ka një marrëdhënie të ngushtë bashkëpunimi me Lëvizjen Vetëvendosje.
