Kryeministri i Kosovës, Albin Kurti në ditën e 7 Marsit – ditën e mësuesit, ka vizituar familjen Dobruna në Gjakovë, në shtëpinë në të cilën ka lindur mësuesja e parë e kryeministrit, Nafije Dobruna Deva.
“Në mëngjesin e sotëm isha për vizitë te familja Dobruna në Gjakovë, në shtëpinë në të cilën është lindur mësuesja ime e parë Nafije Dobruna Deva. Evokuam kujtime të shumta e të paharrueshme me vajzën e mësueses, Afërditën, në këtë shtëpi të vjetër më shumë se dy shekuj, e ku tani banon kolegu im nga qeveria, Agon Dobruna, zëvendësministër i Financave, Punës dhe Transfereve”, u shpreh kështu Kurti në Facebook.
Kurti tha se mësuesja e tij ka qenë kombinim i përsosur i disiplinës dhe dashurisë.
“Mësuesja Nafije ishte kombinimi i përsosur i disiplinës dhe dashurisë: sado nxënës i mirë të kesh qenë, asnjë pesëshe nuk ka qenë e kollajshme. Ajo ka dhënë një kontribut të pamatshëm për arsimimin, edukimin e formimin tim, krahasueshëm me nënën time”, tha Kurti.
Ndryshe, kryeministri Kurti ka treguar se çfarë i dhuroi vajzës së mësueses së tij dhe në fund e ka falënderuar familjen Dobruna për mikpritjen e tyre.
“Përveçse një buqetë me lule, Afërditës ia dhurova fotografinë e klasës I/4 me mësuesen Nafije, nga qershori i vitit 1982. Mandej nga klasa e dytë fotografitë zënë e bëhen me ngjyra. Falënderoj familjen Dobruna për mikpritjen e përzemërt në Ditën e Mësueses”, shtoi Kurti.
