Kryeministri i Kosovës, Albin Kurti, ka treguar se i ka agjëruar disa ditë të muajit Ramazan.
“Në ditët kur kam shkuar nëpër iftare zakonisht kam agjëruar. Dhe këtë e kam bërë, jo vetëm sivjet”, tha Kurti.
Ai iu përgjigj në iftarin e shtruar nga imami i xhamisë “Bedri Kamberi” në lagjen e Spitalit.
Në mesin e mysafirëve të imamit Labinot Maliqi ishin dhe ambasadori i BE-së, Tomas Szunyog; ambasadori i Gjermanisë, Jorn Rohde; ai i Francës, Olivier Guérot; ai i Shqipërisë, Qemal Minxhozi; ambasadorja e Maqedonisë së Veriut, Shpresa Jusufi etj.
“Sonte është edhe Nata e Kadrit, vlerë e veçantë sa i përket besimit, përkushtimit por gjithashtu besimit e paqes. Unë uroj që Zoti të pranoj lutjet dhe agjërimin tuaj dhe mirësia që e keni dhënë”.
“Muaji i Ramazanit, është muaj i sakrificës e cila na mëson që të përkushtohemi. Sivjet Bajrami i Madh bie të premten, pra të xhumanë. Ju dëshiroj agjërim të lehtë”, tha Kurti, në një fjalë të shkurtër, gjatë iftarit.
Nga ana e tij, imami Maliqi falënderoi të gjithë mysafirët, në veçanti shefin e Qeverisë, shkruan EO.
“Iftarin tonë të gjithë na keni nderuar por në veçanti kryeministri jonë Albin Kurti e po ashtu edhe ambasadorë të vendeve mike. Në emrin tim ju falënderoj të gjithëve”, tha Maliqi.
