Kryeministri në detyrë i Kosovës, Albin Kurti, të martëkn ka mirëpritur në takim Presidentin e Parlamentit të landit të Saxony-Anhalt në Gjermani, Gunnar Schellenberger.
Sipas Zyrës së Kryeministrit, Kurti e ka njoftuar atë me zhvillimin ekonomik dhe klimën e investimeve gjatë mandatit qeveritar, ku siç thuhet Kosova ka regjistruar normat më të larta të rritjes ekonomike në Ballkanin Perëndimor.
“ Theksoi incentivat për investitorët vendas dhe të huaj, gjersa vendi ynë po kthehet në një destinacion më tërheqës investimi veçanërisht në fushën e teknologjisë”, thuhet në komunikatë.
Kurti dhe Schellenberger thuhet se kanë biseduar edhe mbi politikat qeveritare për ndërlidhjen e arsimit me tregun e punës sipas modelit gjerman, i cili tashmë po zhvillohet në vend në kuadër të strategjisë kombëtare për modernizimin e arsimit profesional, me fokus në përafrimin e kurrikulave me nevojat e tregut të punës.
Ai po ashtu ka theksuar edhe transformimin digjital si një shtyllë kryesore e agjendës kosovare të reformave, teksa ka vlerësuar dhe përvojën e eksperiencën që mund të ndajë në këtë drejtim landi i Saxony-Anhalt, me shtrirjen e internetit me brez të gjerë në zonat rurale dhe administratën publike.
“Duke shprehur mirënjohjen për vizitën e z. Schellenberger dhe delegacionit të tij në Kosovë, kryeministri tha se ajo do të shërbejë për të thelluar bashkëpunimin, partneritetin dhe lidhjet mes nesh. Prezent në këtë takim ishte dhe ambasadori i Kosovës në Gjermani, Faruk Ajeti”, theksohet në fund të komunikatës.
