Javën e kaluar Kosova u përball sërish me barrikada. Por këtë herë, këto nuk patën jetë të gjatë në veri të vendit.
Krejt këtë strukturat paralele të ndihmuara nga serbët lokalë, e bën për ta kundërshtuar vendimet e qeverisë për targa dhe letërnjoftime.
E plani për këto, sipas kryeministrit të vendit, u gatua në Beograd.
“Prapaskenat e tensioneve të 31 korrikut ishin skenat në Rashkë dhe Beograd ku u mbajtën mbledhjet përgatitore për ato 11[barrikada], plus dy barrikada, që u ngritën në veriun e Kosovës… Dhe së paku, nëntë barrikada janë ngritur brenda 10 minutave. Bëhet fjalë për një organizim dhe një përgatitje që nuk mund të jetë thjesht qytetare, por është shtetërore”, ka deklaruar Kurti.
Ai po ashtu ka thënë se këto vendime, nuk do të diskutohen më 18 gusht në Bruksel, kur do të takohet me presidentin serb, Aleksandër Vuciq.
Ndërsa në këtë intervistë për Radion Evropa e Lirë, Kurti tutje ka thënë se nuk do të ketë asociacion sipas kriterit etnik.
Por ka folur për modelet që ditë më parë i përmendi i dërguari i posaçëm i SHBA-së për Ballkanin Perëndimor, Gabriel Escobar.
“Modelet, të cilat janë zhvillimore, janë padyshim të nevojshme. Nëse kemi, ta zëmë, komunat e Maleve të Sharrit, ose të Bjeshkëve të Rugovës, ose komunat e Lumit Lepenc, komuna të cilat kanë të bëjnë me veçantinë gjeografike, ekonomike e zhvillimore të komunave, unë jam i interesuar”, është shprehur Kurti.
Shefi i ekzekutivit shtoi se marrëveshja përfundimtare me Serbinë, mund të arrihet brenda këtij mandat.
“Brenda këtij mandati ekzistojnë edhe mundësitë, edhe vullneti, edhe interesi për ta realizuar marrëveshjen ligjërisht të obligueshme për normalizim të plotë të marrëdhënieve ndërmjet Kosovës dhe Serbisë, në qendër të së cilës ndodhet njohja reciproke”, ka shtuar Kurti.
Në këtë intervistë Kurti ka folur edhe për situatën me energjinë elektrike në vend.
Raporti i gazetarit Fidan Zejnullahu.
