Kryeministri Albin Kurti ka bërë homazhe dhe ka vendosur lule te varrezat e vëllezërve Yll, Agron e Mehmet Bytyqi, në New York me ç‘rast kërkoi drejtësi për vrasjen e pjesëtarëve të batalionit Atlantiku të UÇK-së, nga aparati shtetëror serb, më 1999.
“Ylli, Agroni dhe Mehmeti janë tre dëshmorë të kombit, janë tre shqiptarë, janë tre amerikanë, janë tre luftëtarë të lirisë, të cilët sakrifikuan gjithçka për lirinë që ne e gëzojmë dhe për shtetin që ne e kemi”, tha Kurti. “Secili brez ka për detyrë të bëjë krejt çfarë mundet edhe dinë, që botën qe e ka gjetur, që Kosovën që e ka gjetur, që shqiptarinë që e ka gjetur, ta shpijë më tutje, në mënyrë që gjeneratat që vijnë ta kenë edhe gjendjen më të mirë, por edhe mundësitë më të mëdha për përparim të mëtutjeshëm”.
Kryeministri deklaroi se, edhe pas 27 vjetësh, përgjegjësit për vrasjen e tre vëllezërve Bytyqi nuk janë përballur me drejtësinë.
“Ende kërkojmë drejtësi, ndërkohë që të vërtetën e dimë”, theksoi ai.
Ilir Bytyqi, vëllai i tre të vrarëve, e falënderoi kryeministrin për homazhet.
“Faleminderit që i nderoni me praninë tuaj. Edhe pas shumë vjetësh, jeta dhe sakrifica e tyre kanë vlerë”, deklaroi Bytyqi.
Në homazhe morën pjesë familjarë, përfaqësues institucionalë dhe anëtarë të komunitetit shqiptaro-amerikan. E pranishme ishte edhe kryetarja e komunës Fairview në New Jersey, Violeta Berisha.
Ylli, Agroni dhe Mehmet Bytyqi ishin shtetas amerikanë me prejardhje shqiptare. Ata u arrestuan në Serbi dhe u vranë në korrik të vitit 1999. Trupat e tyre u gjetën më vonë në një varrezë masive në Petrovo Selo, në Serbi.
