Kryeministri i Kosovës, Albin Kurti, ka uruar qytetarët me rastin e 1 Majit – Ditës Ndërkombëtare të Punëtorëve, duke theksuar rëndësinë historike dhe aktuale të kësaj dite për të drejtat e punëtorëve.
Në një mesazh publik, Kurti rikujtoi se 1 Maji e ka origjinën në vitin 1886 në Çikago, kur punëtorët protestuan për orarin tetëorësh të punës, një kërkesë që në atë kohë u pagua edhe me jetë njerëzish. Sipas tij, të drejtat që sot konsiderohen themelore janë rezultat i sakrificave të vazhdueshme dhe nuk duhet të merren si të mirëqena.
Ai theksoi se edhe në Kosovë puna ka qenë gjithmonë një shtyllë e rëndësishme e qëndresës dhe shtetndërtimit, sidomos në periudha të vështira historike kur qytetarët kanë kontribuar jashtë institucioneve formale.
Duke folur për zhvillimet aktuale, Kurti përmendi sfidat globale me të cilat përballen punëtorët, përfshirë rritjen e punësimit afatshkurtër, pasigurinë nga platformat digjitale dhe ndikimin e automatizimit në tregun e punës.
Në këtë kontekst, ai renditi disa nga masat e ndërmarra nga qeveria. Sipas tij, paga minimale është rritur nga 170 në 425 euro dhe pritet të rritet në 500 euro nga 1 korriku. Po ashtu, është vendosur paga e 13-të për sektorin publik dhe janë zbatuar programe si “Superpuna”, që kanë ndihmuar në punësimin e mijëra të rinjve.
Kurti theksoi gjithashtu se janë rritur pensionet, janë vendosur shtesat për fëmijë dhe për nënat lehona, si dhe janë mbështetur familjet dhe gratë përmes subvencioneve dhe programeve të punësimit.
Ai nënvizoi edhe rëndësinë e miratimit të projektligjit për sigurimet shëndetësore, duke e cilësuar si hap drejt mbulimit universal për të gjithë qytetarët.
Megjithatë, kryeministri vlerësoi se një nga sfidat kryesore mbetet mungesa e organizimit sindikal në sektorin privat, duke bërë thirrje për më shumë angazhim shoqëror në këtë drejtim.
Në fund, Kurti theksoi se 1 Maji nuk është vetëm një ditë simbolike, por një kujtesë se të drejtat e punëtorëve kërkojnë angazhim të vazhdueshëm dhe se përmirësimi i kushteve të punës do të mbetet prioritet i qeverisë./teve1.info/
