Kryeministri i Kosovës, Albin Kurti në Konferencën e Sigurisë në Mynih, është takuar me senatorët amerikan Jeanne Shaheen dhe Chris Van Hollen.
Bëhet e ditur se në takim u bisedua për raportet bilaterale dhe marrëdhëniet e veçanta ndërmjet Republikës së Kosovës dhe Shteteve të Bashkuara të Amerikës.
“Kryeministri Kurti falënderoi senatorët Shaheen dhe Van Hollen për ndihmën, mbështetjen dhe interesimin e vazhdueshëm të tyre dhe të ShBA-ve për Kosovën. Folën për përparimin e shënuar në sundim të ligjit, luftim të korrupsionit, demokratizim të institucioneve dhe zhvillim ekonomik”, thuhet në njoftimin nga Zyra e Kryeministrit.
Teksa thuhet se gjatë takimit u bisedua edhe për situatën e sigurisë në Ballkanin Perëndimor, normalizimin e raporteve mes Kosovës dhe Serbisë dhe për propozimin evropian.
“Në takim u diskutua për situatën e sigurisë në Ballkanin Perëndimor dhe zhvillimet e fundit në rajon. Sa i përket dialogut për normalizim të plotë të marrëdhënieve ndërmjet Republikës së Kosovës dhe Serbisë dhe për propozimin evropian, kryeministri Kurti theksoi angazhimin konstruktiv dhe të vazhdueshëm të Kosovës në këtë proces”, thuhet tutje./teve1.info/
