22 mars 1998, zgjedhjet në kohë lufte
Ishte 22 marsi i vitit 1998.
E në të gjithë Kosovën, qytetarët iu drejtuan kutive të votimit.
Atë të diele, për herë të parë, kosovarët patën mundësi, të votojnë në dy palë zgjedhje.
Kjo meqë të njëjtën ditë, u mbajtën zgjedhjet parlamentare e presidenciale.
Gjithë ditën nga afër procesin zgjedhor, e përcolli gazetari i njohur, Nuhi Bytyqi.
Ky i fundit, për Tëvë1 thotë se ngjarjet që ndodhën më afrimin e zgjedhjeve në kohë lufte.
“U krijua një klimë se duhet të dilej në zgjedhje, mirëpo ka pasur edhe qytetar të Kosovës që nuk kanë marr pjesë në këto zgjedhje sepse kanë konsideruar se nuk kanë kuptim që zgjedhjet të mbahen në rrethana të luftës, në rrethana të shtetrrethimit ushtarak dhe policor serb”, tregon Bytyqi.
E për të njëjtat arsye, Bytyçi tregon se shumë parti shqiptare bojkotuan këto zgjedhje.
“Kemi marr edhe prononcimin e disa partive, liderëve të partive politike, të cilët i bojkotojnë këto zgjedhje. Siç ishte Partia Parlamentare e Kosovës në krye me Adem Demaçin dhe Bajram Kosumin, pastaj Partia Socialdemokrate e Kosovës, e Luljeta Pulës, Uniki Kombi në krye me Ukshin Hotin, Partia Liberale Shqipëtare. Madje edhe Këshilli Koordinues i degëve të LDK-së në Prishtinë” , shprehet ai.
Por, Bytyqi shton se ndryshe nga këto parti politike, dikush tjetër i shihte ndryshe këto zgjedhje.
Behët fjalë për kandidatin e vetëm për president të Kosovës, Ibrahim Rugova.
“Ai kishte një qëndrim që duhet Kosova të i ketë institucionet e veta, duhet të i ketë parlamentin e vetë, presidentin. Të legjitimohet udhëheqja e Kosovës sidomos para faktorit ndërkombëtarë dhe t’i dëshmohet Serbisë së populli shqiptarë i Kosovës nuk pranon as një lloj zgjedhje në kuadër të Serbisë dhe Jugosllavisë”, thotë gazetari Bytyqi.
Ndryshe, shpallja e zgjedhjeve parlamentare dhe presidenciale, ishte bërë me 23 dhjetor të vitit 1997 nga presidenti i Kosovës, Ibrahim Rugova.
Partia e këtij të fundit, LDK, doli fituese e zgjedhjeve, por pavarësisht kësaj, nuk u mbajt asnjë seancë konstituive dhe Kuvendi nuk u funksionalizua.
