Kryeministri në detyrë i Kosovës, Albin Kurti, së bashku me zëvendëskryeministrin në detyrë, Besnik Bislimi, kanë pritur sot paradite ambasadorët dhe përfaqësuesit diplomatikë të vendeve të QUINT-it, si dhe shefin e Zyrës së Bashkimit Evropian në Kosovë.
Gjatë takimit u diskutuan disa prej temave aktuale, përfshirë raportet me Bashkimin Evropian dhe rrugën integruese të Kosovës, bllokimin e deritanishëm të konstituimit të Kuvendit, gjendjen e sigurisë në vend, rreziqet nga dezinformimi, si dhe çështjen e arrestimeve nga autoritetet serbe ndaj qytetarëve kosovarë që udhëtojnë tranzit nëpër Serbi, përfshirë edhe arrestimin e një zyrtari të qeverisë serbe në Kosovë.
Kurti dhe Bislimi i informuan ambasadorët për performancën ekonomike gjatë pjesës së parë të vitit 2025. Sipas tyre, qarkullimi i përgjithshëm i bizneseve për gjashtë muajt e parë ka arritur në 10.7 miliardë euro, një rritje prej 10.3% krahasuar me të njëjtën periudhë të vitit të kaluar.
Gjithashtu, shpenzimet kapitale të qeverisë janë për 24% më të larta sesa në gjysmën e parë të vitit 2024. Ekonomia është rritur për 3.61% në çerekun e parë të vitit. Numri i bizneseve të reja të regjistruara pritet të tejkalojë rekordin e vitit 2024, kur ishin regjistruar 12,051 biznese të reja.
Po ashtu, u veçua skema “Qeveria për Familjet”, e cila ka mbështetur 5,163 familje pa asnjë anëtar të punësuar – prej tyre 809 janë nga katër komunat në veri të vendit. Në fushën e arsimit, u përmend anëtarësimi i Kosovës në Regjistrin Evropian për Cilësi të Arsimit të Lartë (EQAR), si dhe së fundmi në Aleancën Evropiane për Praktikën Profesionale (EAfA).
