Kryeministri në detyrë i Kosovës, Albin Kurti ka thënë se Kosova ka nevojë për mërgatën që na viziton për tu çmallur, por edhe si partnerë të zhvillimit.
Ai kështu është shprehur në Facebook ku ka njoftuar se ka pritur në kryeministri disa bashkatdhetarë.
“Ne kemi gjithmonë nevojë për bashkatdhetarët tanë, mërgatën tonë, si mysafirë që na vizitojnë për t’u çmallur, e si partnerë të zhvillimit dhe bashkëkrijues të së ardhmes tonë. Nuk flasim më për “trurin që ikën”, por për zemrën që nuk harron: sepse ata që kanë ndërtuar jetë jashtë vendit, ruajnë mallin, mbajnë lidhjet dhe bartin përgjegjësinë ndaj atdheut tonë të përbashkët. Secili mund të jetë përkohësisht jashtë atdheut, por gjithsecili është përjetësisht brenda kombit”, ka shkruar Kurti.
