Kryeministri i Republikës së Kosovës, Albin Kurti, së bashku me ministrin e Mbrojtjes, Ejup Maqedonci, priti në takim Oficerin Komandues të anijes amfibe zbarkuese të Shteteve të Bashkuara të Amerikës, USS “Pearl Harbor”, komandantin Alban Dervishi.
Gjatë takimit, kryeministri Kurti e falënderoi oficerin shqiptaro-amerikan për vizitën, duke shprehur kënaqësinë për arritjet e tij në Forcat Detare të SHBA-së.
Ai e vlerësoi Dervishin si një shembull të angazhimit, përkushtimit dhe profesionalizmit.
Në fokus të bisedës ishte bashkëpunimi i ngushtë ndërmjet Forcës së Sigurisë së Kosovës dhe Forcave të Armatosura të SHBA-së, me theks të veçantë në partneritetin me Gardën Kombëtare të Ajovës.
Kryeministri Kurti shprehu mirënjohje për mbështetjen e vazhdueshme të aleatëve amerikanë në forcimin dhe zhvillimin e FSK-së.
Ai gjithashtu ritheksoi se Kosova mbetet e përkushtuar në rrugën e saj drejt integrimit euro-atlantik.
