Kryeministri në detyrë, Albin Kurti, ka zhvilluar të enjten një takim me ish-ministrin e Mbrojtjes të Gjermanisë, Rudolf Scharping.
Kurti ka thënë se gjatë takimit e ka falënderuar Scharpingun për rolin dhe kontributin e tij në mbrojtjen e së drejtës së popullit të Kosovës për të jetuar i lirë, veçanërisht gjatë periudhës së luftës.
Ai ka përmendur edhe librin e Scharpingut, “Wir dürfen nicht wegsehen: Der Kosovo-Krieg und Europa”, në të cilin ish-ministri gjerman dokumenton, sipas Kurtit, vuajtjet e shqiptarëve dhe krimet e kryera nga regjimi i Slobodan Millosheviqit.
“Në takimin e përzemërt që zhvilluam sot në Zyrën e Kryeministrit, e falënderova për rolin jetik dhe kontributin e pamatshëm në mbrojtjen e të drejtës së popullit tonë për të jetuar i lirë, në kohëra kur kishim më së shumti nevojë. Në librin “Wir dürfen nicht wegsehen: Der Kosovo-Krieg und Europa”, që përfshin ditarin me kujtime, ai dokumenton vuajtjet e shqiptarëve dhe krimet monstruoze të regjimit të Sllobodan Millosheviqit”, ka shkruar ai në Facebook.
Sipas Kurtit, denoncimi i planit “Patkoi”, i vrasjeve, masakrave, spastrimit etnik dhe gjenocidit të Serbisë ndaj shqiptarëve gjatë luftës së fundit në Kosovë, si dhe këmbëngulësia e Scharpingut në argumentimin për ndërhyrjen e NATO-s, e kanë vendosur atë “në anën e drejtë të historisë përgjithmonë”.
“Denoncimi i planit ‘Patkoi’, sikurse vrasjeve, masakrave, spastrimit etnik dhe gjenocidit të Serbisë ndaj shqiptarëve në luftën e fundit në Kosovë, krahas këmbëngulësisë në argumentimin për ndërhyrjen e NATO-s, janë qëndrime që ish-ministrin e Mbrojtjes të Gjermanisë, Rudolf Scharping, e vendosin në anën e drejtë të historisë përgjithmonë”, ka përfunduar Kurti./teve1.info/
