Kryeministri në detyrë i Republikës së Kosovës, Albin Kurti, ka pritur sot në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për zhvillimet aktuale politike dhe prioritetet strategjike të vendit.
Sipas njoftimit të Zyrës së Kryeministrit, në qendër të bisedimeve ishte rëndësia e mbajtjes së zgjedhjeve të 28 dhjetorit dhe nevoja për formimin sa më të shpejtë të institucioneve pas përfundimit të procesit zgjedhor.
“Kryeministri Kurti falënderoi Mbretërinë e Bashkuar për mbështetjen e vazhdueshme ndaj Kosovës në shumë fusha, duke përfshirë përkrahjen për Komisionin Qendror të Zgjedhjeve në zhvillimin e softuerit zgjedhor dhe forcimin e infrastrukturës teknologjike të procesit zgjedhor”, thuhet në njoftimin e ZKM-së.
Gjatë takimit, palët diskutuan edhe për prioritetet ekonomike të Kosovës, investimet kapitale të planifikuara, si dhe për procesin e integrimit evropian dhe tema të tjera aktuale me interes të përbashkët.
“Mbretëria e Bashkuar është një aleat kyç dhe një kontribuues i madh në zhvillimin e vendit, ndërsa Kosova mbetet e përkushtuar në forcimin e vazhdueshëm të marrëdhënieve të shkëlqyera dypalëshe”, thuhet më tej në njoftim.
Takimi u vlerësua si konfirmim i partneritetit të fortë ndërmjet Kosovës dhe Mbretërisë së Bashkuar, veçanërisht në mbështetjen e proceseve demokratike dhe zhvillimit institucional të vendit.
