Kryeministri i Republikës së Kosovës, Albin Kurti, është takuar me presidentin turk, Recep Tayyip Erdoğan, në kuadër të nisjes së Javës së Nivelit të Lartë të Asamblesë së Përgjithshme të Kombeve të Bashkuara në New York.
Në takim, njëra ndër temat ishte edhe vendimi i Dhomave të Specializuara të Kosovës ndaj ish-drejtuesve të UÇK-së.
“Në takim kryeministri Kurti diskutoi edhe për aktgjykimin e padrejtë juridikisht dhe moralisht dhe të pasaktë historikisht dhe faktikisht, të shpallur javën e kaluar nga Dhomat e Specializuara në Hagë ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, e që patjetër duhet të korrigjohet në Apel”, thuhet në komunikatën e Qeverisë.
Në diskutim me presidentin turk, Kurti foli edhe për komunitetin shqiptar në Preshevë.
“Çështje tjetër, të cilën e ngritën kryeministri Albin Kurti bashkë me kryetaren e Preshevës, Ardita Sinani, ishte diskriminimi i vazhdueshëm dhe sistematik i shtetit të Serbisë ndaj komunitetit shqiptar atje, nga pasivizimi i adresave, mosnjohja e diplomave e nënpërfaqësimi në secilin institucion shtetëror atje. Kryeministri theksoi se simetria e të drejtave të komuniteteve në vendet përkatëse është qasja dhe mënyra e domosdoshme për trajtim të drejtë dhe barabartë”, thuhet më tej në komunikatën e Qeverisë.
Në fund të njoftimit të Qeverisë bëhet e ditur se Kurti dhe Erdoğan u shprehën për vazhdimin e thellimit të marrëdhënieve ndërmjet Kosovës dhe Turqisë, veçanërisht në fushën ekonomike dhe tregtare.
