Kryeministri në detyrë i Kosovës, Albin Kurti ka reaguar pas kritikave të vendimit të Qeverisë për subvencionimin e linjave ajrore për mërgatën.
Kuri ka thënë se një gjë të tillë e bëjnë shumica e shteve në rajon.
Ai në një postim në Facebook ka thënë se kjo mbështetje për mërgatën u bë e domosdoshme.
“Subvencionimin e linjave ajrore për destinacione të caktuara e bëjnë shumica e shteteve ne rajon e më gjerë, me qëllim nxitjen e turizmit. Me mërgatën tonë të mrekullueshme që nuk humb asnjë vit pa ardhur në vendlindje, ne e kemi edhe një arsye më shumë që ta bëjmë këtë. E përballë rrezikut që një pjesë e fluturimeve të planifikuara gjatë muajve korrik dhe gusht të anulohen për shkak të rritjes së kostos së karburantit, vendimi ynë i djeshëm për të subvencionuar linjat ajrore që lidhin destinacionet e mërgatës sonë u bë i domosdoshëm”, ka shkruar Kurti.
Ai ka sqaruar se ndarja e 2 milionë eurove për subvencionimin e linjave ajrore që lidhin Aeroportin “Adem Jashari” mbulon periudhën deri në fund të muajit tetor, duke mohuar se një gjë e tillë është bërë për blerje votash.
“Vendimi i djeshëm për të ndarë 2 milionë euro ka për qëllim subvencionimin e linjave ajrore që lidhin Aeroportin “Adem Jashari” me aeorportet prej nga vijnë mërgata jonë, dhe mbulon periudhën e mbetur të sezonit veror të aviacionit, që është deri në fund të muajit tetor. Pra nuk bëhet fjalë për blerje biletash apo ardhje të organizuar për zgjedhje, siç u pretendua nga disa qarqe të bllokut opozitar. Kjo është një skemë mbështetëse sikurse e bëjnë shumica e shteteve të rajonit, e cila mundëson që mërgata jonë të mund të vijnë e të na vizitojnë edhe këtë verë, sikurse çdo vit”, ka sqaruar Kurti.
Qeveria në detyrë martën ka ndarë mjete buxhetore në shumë 2 milionë euro për zbatimin e Masës 4.5 ”Mbështetja e Mërgatës” të Pakos së Ringjalljes Ekonomike, “për mbështetjen e linjave të fluturimit për destinacionet që shërbejnë mërgatën tonë”.
Vendimi u kritikua nga opozita dhe analistët duke akzuar Qeverinë se me një veprim të tillë po synon “blerjen e votave”./teve1.info/
