Kryeministri në detyrë i Kosovës dhe kryetar i Lëvizjes Vetëvendosje, Albin Kurti, ka thënë se sjellja e Lidhjes Demokratike të Kosovës (LDK) është e çuditshme. Ai ka shtuar se nuk e kupton që LDK nuk dëshiron koalicion as me LVV-në, as me partitë tjera.
“Nuk po e kuptoj Lidhjen Demokratike saktësisht, ju them sinqerisht. Nuk duan qeveri që udhëhiqet nga Lëvizja Vetëvendosje dhe nga unë, nuk duan ta formojnë qeverinë e tyre me partitë tjera opozitare. Por insiston në zgjedhje të reja ku, siç mendojnë ata, do të dalin të parët. Nuk dalin të parët. Është e çuditshme kjo sjellje: ose bëjnë koalicion si i treti me të parin, ose bëjnë koalicion me të dytin kundër të parit, me dikë duhet të bashkëpunojnë,” tha Kurti në një konferencë për media, raporton teve1.info.
Ai gjithashtu theksoi se LDK ka refuzuar dy oferta të LVV-së për koalicion, për të cilat tha se nuk është penduar.
“LDK nuk ka shprehur gatishmëri për bashkëqeverisje as me partitë ish-opozitare. Kjo parti kishte propozuar një Qeveri gjithëkombëtare,” shtoi Kurti.
