Kryeministri i Kosovës, Albin Kurti, sot gjatë homazheve në sheshin e Prishtinës ka folur edhe për çështjen e dinarit, duke përmendur periudhën tranzitore prej një muaji, ku do të ketë më shumë informim për serbët.
Kurti ka thënë se Rregullorja e BQK-së nuk e ndalon dinarin, por nuk e lejon atë si mjet pagese.
Ai ka thënë se njëjtë siç ishin konvertuar nga targat ilegale “KM” në RKS, do të kalojnë edhe nga dinari në euro, madje më shpejt dhe më lehtë.
“BQK është institucioni pavarur. E ka marrë vendimin. Ne do të intensifikojmë fushatën komunikuese me të gjithë ata që e kanë kuptuar ose kanë nevoje ta ridëgjojnë, që dinari në Kosovë s’po ndalohet, por nuk lejohet si mjet pagese. Kosova e ka euron dhe ashtu qysh janë konvertuar targat KM në RKS, edhe më shpejt dhe më kollaj do të bëhet konvertimi nga dinari në euro. Dinari për pagesë ka qenë në shekullin e kaluar. Këtë shekull kemi pasur markën gjerman e euron. Nuk besoj që serbët e urrejnë euron”, ka deklaruar Kurti.
