Kryeministri Albin Kurti, i ka dërguar letër shefit të Misionit të OSBE-së në Kosovë, Michale Davenport, lidhur me mundësinë që komuniteti serb në Kosovë të merr pjesë në zgjedhjet e Serbisë.
Në letrën e Kurtit të cilin e ka siguruar Tëvë 1, thuhet se duhet të ketë marrëveshje të veçantë ndërmjet Kosovës dhe Serbisë, dhe kërkesa duhet të vijë nga Serbia, si palë e interesuar, bazuar në sovranitetin dhe pavarësinë e Kosovës.
“Lidhur me të njëjtën, dhe në lidhje me çështjen e bashkëpunimit ndërshtetëror për votimin jashtë vendit, me qëllim që të mundësohet që qytetarët e komunitetit serb në Kosovë me shtetësi të dyfishtë të votojnë në zgjedhjet serbe jashtë Zyrës Ndërlidhëse të Serbisë në Kosovë, është e nevojshme një marrëveshje e veçantë ndërmjet Republikës së Kosovës dhe Serbisë. Kërkesa për këtë marrëveshje duhet të vijë nga Serbia si palë e interesuar”, thuhet në letrën e Kurtit.
Ai ka thënë se për mbajtjen e zgjedhjeve të Serbisë në Kosovë, duhet shikuar edhe korniza e re ligjore e “cila është ndërtuar mbi praktikat më të mira evropiane dhe ndërkombëtare”
“Lidhur me të njëjtën, dhe në lidhje me çështjen e bashkëpunimit ndërshtetëror për votimin jashtë vendit, me qëllim që qytetarët e komunitetit serb në Kosovë me shtetësi të dyfishtë të votojnë në zgjedhjet serbe jashtë Zyrës Ndërlidhëse të Serbisë në Kosovë,një marrëveshje e veçantë duhet të vijë nga Serbia si palë e interesuar. Dhe çdo kërkesë e tillë duhet të marrë për bazë sovranitetin dhe pavarësinë e Kosovës, si shtet i barabartë, në përputhje me nenin 2 të Marrëveshjes Themelore të arritur këtë vit ndërmjet Kosovës dhe Serbisë”, thuhet në letër.
Qeveria e Kosovës, ka inkurajuar Serbinë që në bazë të këtyre kushteve të negociojë marrëveshjen për këto zgjedhje.
“Me këto kushte, ne inkurajojmë Serbinë që të negociojë një marrëveshje të tillë speciale me Republikën e Kosovës, duke zbatuar në këtë mënyrë edhe një detyrim tjetër të Marrëveshjes Themelore: të kontribuojë në marrëdhëniet e fqinjësisë së mirë, në bazë të të drejtave të barabarta dhe respektimit reciprok të të drejtat e votuesve jashtë vendit”, thuhet në letër.
Zgjedhjet lokale dhe parlamentare në Serbi do të mbahet më 17 dhjetor.
Misioni i OSBE’së në Kosovë ka thënë se Beogradi ka kërkuar nga ta që t’i grumbullojnë votat e votuesve serbë që jetojnë në Kosovë. Ky mision ka thënë se e kanë informuar Qeverinë e Kosovës.
Qeveria e Kosovës në vitin 2022, kishte ndaluar mbajtjen e zgjedhjeve të Serbisë në Kosovë.
Zgjedhjet e fundit parlamentare, që Serbia i ka organizuar edhe për komunitetin serb në Kosovë, kanë qenë ato të 21 qershorit 2020.
Ato zgjedhje janë mbajtur sipas një praktike të mëhershme, ku misioni në Kosovë i Organizatës për Siguri dhe Bashkëpunim në Evropë i ka grumbulluar votat. Ato vota më pas janë numëruar në Rashkë dhe Vranjë, dy qytete kufitare të Serbisë.
Kjo praktikë e mbledhjes së votave nga OSBE-ja në Kosovë është krijuar qysh në vitin 2017 dhe autoritetet e Kosovës e kanë lejuar këtë gjë deri vitin e kaluar.
