Kryeministri në detyrë i Republikës së Kosovës, Albin Kurti, ka deklaruar se Serbia po vazhdon përpjekjet për destabilizimin e vendit, por institucionet e sigurisë dhe inteligjencës së Kosovës po kundërvihen me efikasitet.
Në një deklaratë në mbledhjen e Qeverisë, Kurti theksoi se ndërsa Kosova është e përkushtuar në forcimin e partneriteteve me shtetet demokratike dhe paqedashëse, Serbia, sipas tij, po mban qëndrim agresiv ndaj Kosovës.
“Ndërkohë që ne po angazhohemi për thellim e forcim të partneriteteve me shtetet aleate, demokratike e paqedashëse, fqinji ynë agresiv, Serbia, po i vazhdon përpjekjet për destabilizim të vendit tonë. Mirëpo, institucionet e inteligjencës dhe sigurisë të Republikës së Kosovës janë duke u kundërvënë suksesshëm ndaj këtyre përpjekjeve”, tha Kurti.
Ai përmendi gjithashtu edhe veprime konkrete të ndërmarra nga institucionet e sigurisë, përfshirë arrestimin e Bojan Jevtiq, toger në Policinë e Kosovës, i cili u arrestua në korrik nën dyshime të bazuara për veprimtari spiunazhi.
Kurti vlerësoi angazhimin e institucioneve për mbrojtjen e sovranitetit dhe rendit kushtetues të vendit, duke theksuar se përpjekjet për destabilizim nuk do të tolerohen dhe do të marrin përgjigje të merituar nga organet kompetente.
