Kryeministri në detyrë i Kosovës, Albin Kurti, ka theksuar se normalizimi i marrëdhënieve me Serbinë është i vështirë pa njohjen e krimeve të kryera gjatë luftës dhe respektimin e marrëveshjeve të nënshkruara në kuadër të dialogut.
Ai ka theksuar nevojën për dorëzimin e Milan Radoiçiqit, i akuzuar për planifikimin e sulmit në Banjskë më 2023, para se të rifillojë dialogu mes dy vendeve. “Serbia duhet të dorëzojë Milan Radoiçiqin,” ka thënë Kurti, duke shpresuar se BE-ja, Franca dhe Gjermania do të ushtrojnë presion mbi Beogradin për ta bërë këtë.
Në një intervistë për agjencinë franceze të lajmeve AFP, Kurti ka folur edhe për lidhjet e ngushta të Serbisë me Rusinë. Ai ka paralajmëruar se nëse Rusia vendos të destabilizojë rajonin, mund të mbështetet te Serbia si aleate, gjë që sipas tij, është shqetësuese për Kosovën. “Po punojmë me partnerët tanë për të parandaluar që kjo të ndodhë,” ka shtuar ai.
Kurti ka folur gjithashtu për marrëveshjen me Shtetet e Bashkuara për pranimin e migrantëve nga vendet e treta, duke bërë të ditur se deri më tani në Kosovë ka arritur vetëm një person. “Ne nuk po kërkojmë ndihmë financiare në këmbim. Këtë po e bëjmë për ta ndihmuar SHBA-në, e cila është partnere, aleate dhe mike e jonë,” ka deklaruar ai, duke mos përjashtuar mundësinë e arritjes së marrëveshjeve të ngjashme edhe me shtetet evropiane.
