Me këtë rast, Kurti tha se politika, diplomacia dhe historia vështirë se kombinohen në një mënyrë më të përsosur sesa te personaliteti i sekretares Madeleine Albright.
Ai theksoi se Albright çdo herë kur fliste apo shkruante ishte shumë profesionale, shkruan teve1.info
“Ajo në politikë ishte historiane, në histori ishte diplomate, ndërkaq në diplomaci ishte politikane. Kur kemi parasysh edhe përvojën e saj jetësore si emigrante hebreje në Shtetet e Bashkuara, e cila fëmijërinë e ka kaluar gjatë luftës së Dytë Botërore dhe më pastaj është shkolluar në vendin tempull të demokracisë, e është bërë sekretarja e parë e shtetit amerikan grua, natyrisht që kemi të bëjmë me një figurë e cila nuk i takon vetëm shekullit XX por edhe atij XXI. Çdo herë kur fliste vepronte ose shkruante ishte aq profesionale në secilin prej asaj çfarë bënte e thoshte sa që mund të quhet profesioniste për shkak të qenies së saj së gjithanshme”, tha Kurti.
Kryeministri Kurti theksoi se dija e thellë dhe mendja e mprehtë e sekretares Albright e bëjnë një personalitet i cili do kumbojë gjatë jo vetëm në SHBA e Kosovë, por edhe në shumë vende të tjera të botës.
“Dija e saj e thellë, mendja e mprehtë, dashuria e paepur për të drejtat dhe liritë për qytetarët në Republikë, orientimi i saj për demokracië sociale dhe gjithashtu edhe njohuritë e jashtëzakonshme për gjeopolitikën e bëjnë një personalitet i cili do të kumbojë gjatë jo vetëm në politikën dhe qeverisjen në Shtetet e Bashkuara të Amerikës e te në Kosovë por edhe në shumë vende të tjera të botës”, theksoi Kurti.
Kreu i Ekzekutivit shtoi se “ndërhyrja e NATO-s për të ndalur gjenocidin në Kosovë me bombardimet kundër Jugosllavisë dhe Serbisë së Millosheviqit, padyshim që mban vulën e Albright dhe për këtë ne duhet të jemi falënderues e mirënjohës”. /Teve1.info/
