Kryeministri në detyrë i Kosovës, Albin Kurti ka thënë se gjatë qeverisjes së tij tre herë janë rritur pagat në sektorin publik, ndërsa dy herë pagën minimale në sektorin privat.
Ai ka thënë se kanë punuar në rritjen e punësimit dhe punë të dinjitetshme.
Kurti kështu ka shkruar në Facebook me rastin e 1 Majit, Ditës Botërore të Punëtorëve
“Në këto dy kahje, gjatë mandatit tonë tre herë i kemi rritur pagat në sektorin publik, kurse pagën minimale në sektorin privat dy herë – nga 135/170 në 264, e pastaj në 350 euro, kemi subvencionuar rritjen e pagës për 17 mijë punëtorë në sektorin privat e mbi 16 mijë të rinj mes moshës 18-29 vjeç janë punësuar përmes platformës qeveritare Superpuna, prej tyre më shumë se gjysma vajza dhe gra. Papunësinë e kemi ulur nga më shumë se 25% në më pak se 11%, e kemi rritur formalizimin e punësimit duke u ofruar kështu punëtorëve qasje në të drejtat e tyre që u takojnë me ligj, i kemi shtuar inspektimet sepse e kemi trefishuar numrin e inspektorëve të punës, dhe do ta pesëfishojmë deri në fund të vitit”, ka shkruar Kurti.
Ai ka folur edhe për funksionim e sindikatave në Kosovë, duke thënë se ato duhet të bëhen pjesë aktive e atyre në Evropë.
“Ndërkaq, sindikatat tona duhet të jenë me më shumë punëtorë, e gjithnjë e më pak punëtorë pa sindikata. Dhe, ato të bëhen e të jenë pjesë aktive e rrjeteve të sindikatave në Evropë për më shumë solidaritet për njëri-tjetrin, organizim e mbrojtje të të drejtave dhe lirive të punëtorëve. Përkundër progresit dhe përmirësimeve, nuk jemi ende aty ku duam e duhet të jemi, andaj puna, angazhimi dhe përkushtimi ynë për të rritur mirëqenien e qytetarëve përmes punësimit dhe mbrojtjen e punëtorëve në vendet e punës vazhdon”, ka shkruar Kurti.
