Kryeministri në detyrë dhe kryetari i Lëvizjes Vetwvendosje, Albin Kurti, ka reaguar pas aktgjykimit të djeshëm të Gjykatës Kushtetuese që thekson se obligimi për ta konstituuar Kuvendin është detyrë e të gjithë deputetëve dhe jo vetëm e subjektit të parë.
Në emër të grupit më të madh parlamentar të dalë nga zgjedhjet e 9 shkurtit 2025, Kurti njoftoi se u është drejtuar të gjithë krerëve të partive të përfaqësuara në legjislaturën e nëntë me ftesë për një takim të përbashkët.
“Ftesa është bërë për të shtunën (nesër) në orën 16:00, si përpjekje e radhës për arritjen e konsensusit të nevojshëm për konstituimin e Kuvendit,” theksoi Kurti.
Ai shtoi se aktgjykimi e bën të qartë se përgjegjësia për konstituim është kolektive dhe kërkon përfshirje e bashkëpunim nga të gjitha subjektet politike.
