Kryeministri i Kosovës, Albin Kurti, ka deklaruar në Kuvend se Qeveria e Kosovës nuk ndërhyn në proceset gjyqësore që po zhvillohen ndaj ish-krerëve të UÇK-së në Hagë, duke theksuar pavarësinë e plotë të sistemit të drejtësisë dhe respektimin e mekanizmave ndërkombëtarë.
Ai ka thënë se komunikimi institucional me partnerët ndërkombëtarë është i rregullt dhe i strukturuar, por gjithmonë i kufizuar nga natyra e ndjeshme e proceseve gjyqësore.
“Komunikimi institucional me partnerët ndërkombëtarë është i vazhdueshëm dhe i strukturuar, duke u zhvilluar në mënyrë të përgjegjshme dhe në përputhje me natyrën e ndjeshme të proceseve gjyqësore. Po ashtu, nuk kemi hezituar të ngremë zërin kundër vendimeve të padrejta ndaj krerëve të UÇK-së, siç ishin për shembull moslejimi i ish-presidentit Thaçi për të marrë pjesë në varrimin e babait të tij, si dhe pranimi i dokumenteve zyrtare të shtetit serb si prova në procesin gjyqësor atje,” ka thënë Kurti.
Ai ka shtuar se struktura ligjore e Dhomave të Specializuara garanton pavarësinë e tyre të plotë nga ekzekutivi, duke e bërë të pamundur ndërhyrjen e Qeverisë në proceset gjyqësore.
“Sa i përket pretendimeve për mungesë informacioni apo koordinimi, është e rëndësishme të potencohet se vetë arkitektura juridike e dhomave të specializuara, e themeluar në bazë të marrëveshjeve ndërkombëtare dhe legjislacionit të brendshëm, garanton pavarësinë e plotë të saj nga ekzekutivi. Kjo nënkupton që qeveria nuk ndërhyn në procedura gjyqësore dhe as nuk ka qasje të drejtpërdrejtë në informacionet operative të proceseve në zhvillim,” është shprehur ai.
Kurti ka theksuar se, pavarësisht kësaj, Qeveria ka detyrimin të ngrejë çështje parimore dhe të kërkojë respektim të standardeve ndërkombëtare të të drejtave të njeriut dhe transparencës.
“Megjithatë, kjo nuk përjashton përgjegjësinë tonë për të ngritur çështje të karakterit parimor dhe për të kërkuar standarde të larta të transparencës dhe të respektimit të të drejtave themelore. Ne kemi ngritur zërin dhe do të vazhdojmë të insistojmë që çdo proces të zhvillohet në përputhje të plotë me standardet ndërkombëtare për një gjykim të drejtë, transparent dhe të paanshëm,” ka theksuar kryeministri.
Ai ka shtuar gjithashtu se institucionet e Kosovës vlerësojnë se vendi ka kapacitet të plotë për të garantuar sigurinë dhe mbarëvajtjen e proceseve gjyqësore, duke përfshirë edhe qëndrimin e të akuzuarve në territorin e vendit, nëse do të kërkohej një gjë e tillë nga mekanizmat përkatës./teve1.info/
