Kryeministri në detyrë i Kosovës, Albin Kurti, ka deklaruar se sapo të fillojë punën Kuvendi i Kosovës, do të zgjidhet Qeveria e re. Ai ka theksuar se mandati i tij i tretë në krye të ekzekutivit do të jetë “tamam”, duke e krahasuar me dy mandatet e mëparshme.
Në një intervistë për KosovaPress, Kurti ka shpjeguar se mandati i tij i parë kishte qenë më i shkurtër se sa ishte planifikuar, ndërsa mandati i dytë po zgjat përtej afatit për shkak të vonesave në formimin e institucioneve pas zgjedhjeve të 9 shkurtit.
“Ne jemi Qeveria në detyrë. Posa të fillojë punën Kuvendi, e zgjedhim qeverinë e re. Jam në muajin e shtatë të vitit të pestë të mandatit katërvjeçar. Pra është më shumë sesa është dashur. Herën e parë ishte më pak se sa është dashur, herën e tretë do të jetë tamam,” tha Kurti.
Ai gjithashtu ka lënë të kuptohet se nuk përkrah idenë e partneres së tij të koalicionit dhe kryetares së Alternativës, Mimoza Kusari-Lila, për formimin e një qeverie të përkohshme.
