Kurti ka thënë se ka dëme të konsiderueshme materiale, ku janë dëmtuar ndërtesa e infrastrukturë publike, shtëpi banimi, ferma bujqësore e biznese, teksa shtoi se Qeveria dhe komunat po punojnë bashkë në mbështetjen e qytetarëve dhe tejkalimin e situatës pas vërshimeve, raporton teve1.info
Tutje Kurti ka bërë të ditur se pas takimit me kryetarët e komunave të Skenderajt dhe Mitrovicës kanë vizituar disa vendbanime të përmbytura.
“Ka dëme të konsiderueshme materiale: janë dëmtuar ndërtesa e infrastrukturë publike, shtëpi banimi, ferma bujqësore e biznese. Në Skënderaj janë rrënuar ose dëmtuar nëntë ura të vogla kurse në Llaushë vizituam një fermer të cilit i janë mbytur mbi 10 mijë pula. Nëpër muret e ndërtesave kishte ngelur lart vija e gjurmës deri ku kishte arritur përmbytja ndërkaq brigjet e deformuara të lumenjve si dhe arat rrotull janë përplot bërllog. Vërshimi në fshatin Lisicë të Mitrovicës, sipas banorëve, është pasojë e shtyrjes për afër 300 metra të rrjedhës së lumit Ibër si rezultat i ndërtimit të stadiumit në pjesën veriore të qytetit. Ibri e Sitnica janë bërë bashkë dhe janë shndërruar në liqe. Ka jo pak kafshë të ngordhura, andaj edhe rrezik për epidemi”, ka shkuar Kurti.
Kryeministri Kurti, theksoi se pjestarët e FSK-së dhe të policisë e zjarrfikësve e ndërmarrjeve publike kanë shpërndarë ushqim, veshmbathje, barna e pako higjenike për familjet e evakuuara.
