Në komunikatë thuhet se Trepça tanimë ka angazhuar 210 punonjës dhe së shpejti planifikon të hapë pozita të reja për fuqinë punëtore.
“Me pagë mesatare prej 805 euro për minatorët, Trepça është ndër punëdhënësit kyçë në zonat ku operon. Së fundmi, krahas fillimit të pagesave të kontributeve pensionale të punëtorëve, për herë të parë pas shumë vitesh, në kuadër të skemës së praktikës në punë, Trepça ka angazhuar 210 punonjës dhe së shpejti planifikon të hapë pozita të reja për të freskuar fuqinë punëtore”, kanë shkruar në komunikatë.
Njëherit, Kurti theksoi përkushtimin që ka për Trepçën dhe minatorët, teksa u zotua për përkrahje të mëtejme dhe të vazhdueshme të Qeverisë.
Gjithashtu, kanë bërë të ditur se vetëm gjatë vitit 2022, Trepça ka ulur shpenzimet duke rritur të hyrat nga buxheti vetanak.
“Gjatë vitit 2022, Trepça ka arritur që të ulë shpenzimet, të rrisë të hyrat dhe të rrisë investimet kapitale nga buxheti vetanak. Shpenzimet e pagave dhe shpenzimet operative janë ulur për 9 për qind, respektivisht 18 për qind, të hyrat nga shitja e koncentratit të plumbit e zinkut janë rritur për 23 për qind, ndërkaq investimet kapitale nga buxheti vetanak për vitin 2022 janë rritur për 20%”, thuhet tutje.
Ndërsa, Trepça me përkrahje nga Qeveria, do bëjë investime kapitale në teknologji moderne dhe efiçiente, raporton teve1.info.
“Për një ringritje të qëndrueshme si ndërmarrje, Trepça po planifikon hapat e radhës me përkrahjen e Qeverisë, si shitja e mbetjeve në vlerë prej dhjetëra miliona eurosh dhe investimet kapitale në teknologji moderne dhe efiçiente, që mundësojnë shfrytëzimin më të mirë të energjisë dhe xehes dhe mbron njëherësh mjedisin”, kanë shkruar më tej.
Ndërkaq, në takim kryeministri Kurti ishte i shoqëruar nga ministrja e Ekonomisë, Artane Rizvanolli dhe zëvendësministri i Ekonomisë, Getoar Mjeku./teve1.info/.