Kryeministri i rizgjedhur i Kosovës, Albin Kurti, ka deklaruar se vendi po e mbyll vitin 2025 me lajme shumë pozitive për qytetarët, përkundër sfidave të ndryshme.
Në një postim në Facebook, Kurti ka renditur 10 arritjet kryesore të vitit, duke përfshirë rritjen e shtesave për nënat lehona dhe pensioneve, përmirësimin e sigurisë dhe forcimin e ushtrisë, investime në infrastrukturë, përurimin e Depos Qendrore të Barnave, dhe heqjen e Kosovës nga listat e FMN-së dhe Bankës Botërore të shteteve në situata të brishta dhe konflikte.
“Po e mbyllim një vit me shumë lajme shumë të mira për vendin dhe qytetarët, përkundër sfidave. Këto janë top 10 lajmet e mira të vitit 2025: Rritja e shtesave për nënat lehona nga 170 euro në 325.9 euro dhe e pagesës së pushimit të lehonisë nga Qeveria prej 223 euro në 319, rritja e pensionit bazik në 150 euro, forcimi i ushtrisë me dronë amerikanë Puma, dronë luftarakë turk Skydagger dhe sistemin antitank gjerman Panzerfaust, 4 njohje të reja, pasaportë edhe më e fuqishme në indekset ndërkombëtare dhe heqja e masave të padrejta të BE-së, ndërtimi i dy urave të reja mbi lumin Ibër në Mitrovicë, një për këmbësorë dhe një për vetura, përurimi i Depos së re Qendrore të Barnave, pas më shumë se 20 vjetëve, anëtarësimi me të drejta të plota në EQAR, pas përjashtimit në vitin 2018, vazhdimi i programit Kompakt të Korporatës së Sfidave të Mijëvjeçarit, 202 milionë dollarë grant nga shteti amerikan investim në sektorin e energjisë, Bursa e Mobilitetit për Studentë që udhëtojnë për të ndjekur studimet, për herë të parë një mbështetje e tillë për studentë, Kosova hiqet nga listat e FMN-së dhe Bankës Botërore të shteteve në Situata të Brishta dhe Konflikti”, ka shkruar Kurti./teve1.info/
