Kryeministri i Kosovës, Albin Kurti, sot ka pritur në takim lamtumirës të ngarkuarin me punë në Ambasadën e Japonisë në Kosovë, Keisuke Yamanaka.
Në komunikatën e Zyrës së Kryeministrit bëhet e ditur se Kurti e ka falënderuar Yamanakan për kontributin e tij në thellimin e marrëdhënieve mes dy vendeve tona dhe fuqizimin e bashkëpunimit të dyanshëm.
Kurti i shprehu mirënjohjen për mbështetjen e vazhdueshme ndaj Kosovës veçanërisht nëpërmjet projekteve të realizuara përmes Agjencisë Japoneze për Bashkëpunim Ndërkombëtar, JICA.
“Diskutuan rreth panairit botëror të bizneseve që do të mbahet këtë vit në Japoni, Expo 2025 Osaka, ku Kosova do të jetë pjesëmarrëse, e cila paraqet një mundësi të mirë për të promovuar kulturën e vendit, ekonominë tonë në rritje, si dhe përkushtimin për të mirëpritur investitorët japonezë dhe për të rritur bashkëpunimin në fusha me interes të përbashkët”, thuhet tutje në komunikatë.
Ndryshe, në këtë takim u shkëmbyen edhe dhurata.
Kurti i dhuroi ambasadorit një çifteli në filigran, librin e autorit Shyqyri Nimani dhe një CD nga Filarmonia e Kosovës, ndërkaq ambasadori i dhuroi kryeministrit suvenirin e maces fatsjellëse Maneki-Neko./teve1.info/
