Kryeministri në detyrë i Kosovës, Albin Kurti, ka pritur sot në zyrën e tij ish-kongresistin amerikan me origjinë shqiptare, Joe DioGuardi, dhe bashkëshorten e tij, Shirley Cloyes DioGuardi.
Takimi u zhvillua një ditë pasi ushtruesja e detyrës së presidentes, Albulena Haxhiu, dekretoi dhënien e shtetësisë së Kosovës për Joe dhe Shirley DioGuardi, në shenjë vlerësimi për kontributin e tyre të gjatë në mbështetje të Kosovës dhe shqiptarëve.
Sipas Zyrës së Kryeministrit, gjatë takimit Kurti i ka falënderuar DioGuardët për angazhimin e tyre shumëvjeçar, fillimisht përmes Kongresit të Shteteve të Bashkuara dhe më pas përmes veprimtarisë së tyre në Ligën Qytetare Shqiptaro-Amerikane.
Kurti ka theksuar se Joe dhe Shirley DioGuardi kanë qenë vazhdimisht të angazhuar në mbështetje të shqiptarëve dhe se edhe sot vazhdojnë të interesohen për zhvillimet në Kosovë.
“Të dy përherë dhe palëkundur qëndruan për kombin dhe me popullin shqiptar. Joe e Shirley gjithnjë interesohen për zhvillimet në Kosovë dhe japin ide e kontribut të çmuar”, ka deklaruar Kurti.
Në vijim, kryeministri në detyrë ka takuar edhe anëtarë të Bordit të Ligës Qytetare Shqiptaro-Amerikane. Me ta ka diskutuar për zhvillimet aktuale në Kosovë, angazhimin e tyre dhe perspektivën e vendit.
Kurti ka veçuar edhe rolin e Joe DioGuardit si kongresisti i parë amerikan me origjinë shqiptare, duke përmendur krahas tij edhe figura të tjera amerikane që, sipas tij, kanë qenë zëra të rëndësishëm në mbështetje të shqiptarëve të Kosovës, si Tom Lantos, Bob Dole dhe Eliot Engel.
“Kosova ishte me fat dhe e bekuar që pati ambasadorë të këtillë, edhe kur s’kishte ambasadë të Republikës në SHBA, andaj jemi përherë mirënjohës si shtet dhe popull”, ka theksuar Kurti.
