Kryeministri në detyrë i Kosovës, Albin Kurti, ka pritur të hënën në takim ambasadoren e re të Suedisë në Kosovë, Åsa Pehrson.
Kurti ka bërë të ditur se me ambasadoren Pehrson është takuar edhe më herët, rreth dy dekada më parë, në kuadër të Balkan Desk në Stokholm.
“Pas dy dekadash nga takimi ynë i parë në Balkan Desk në Stokholm, u takuam sërish sot në Kryeministri me Åsa Pehrson, tash ambasadore e re e Suedisë në Prishtinë”, ka shkruar Kurti në Facebook.
Gjatë takimit, Kurti e ka falënderuar ambasadoren për mbështetjen dhe kontributin që, sipas tij, Suedia ka dhënë për Kosovën dhe qytetarët e saj para dhe pas çlirimit dhe shpalljes së pavarësisë.
Kryeministri në detyrë ka theksuar se Suedia është një nga vendet mike të Kosovës dhe një prej donatorëve më të mëdhenj të vendit.
Ai ka përmendur gjithashtu kontributin e ushtarëve suedezë në kuadër të KFOR-it që nga paslufta, si dhe rolin e Suedisë në strehimin e familjeve shqiptare nga Kosova.
“Si një vend mik i Republikës së Kosovës dhe një ndër pesë donatorët tanë më të mëdhenj, 9 mijë ushtarë suedezë që kanë kontribuar në kuadër të KFOR-it që nga çlirimi, Suedia u bë shtëpi e shumë familjeve shqiptare të Kosovës, duke përfshirë edhe minatorë të Trepçës që u detyruan të largoheshin nga Kosova pas grevës së minatorëve më 1989”, ka shtuar Kurti.
Në takim është diskutuar edhe për zhvillimet në vend.
Kurti ka njoftuar ambasadoren Pehrson për zhvillimet në ekonomi, përparimin në fushën e drejtësisë dhe fusha të tjera, ndërsa kanë diskutuar edhe për situatën politike aktuale në Kosovë.
Kurti ka thënë se gjatë takimit ka kërkuar vazhdimin e mbështetjes së Suedisë për Kosovën në procesin e integrimit dhe anëtarësimit në institucionet euro-atlantike./teve1.info/
