Kryeministri i Kosovës, Albin Kurti ka thënë se çështja e kontestimit të gjuhës shqipe në Maqedoninë e Veriut është çështje e Gjykatës Kushtetuese të Maqedonisë për çka ka thënë se presin vendim të drejtë dhe jo diskriminues.
Kurti ka sqaruar se nuk ka ligj për përdorimin e gjuhës shqipe dhe nuk ka pasur as në të kaluarën por sipas tij ekziston ligji për përdorimin e gjuhëve.
“Çfarë kam kuptuar unë është çështje e Gjykatës Kushtetuese te Maqedonisë pasi që tri dispozita për ligjin për përdorimin e gjuhëve janë dërguar te Komisioni i Venecias. Këto tre dispozita paradoksalisht nuk janë zbatuar në të kaluarën. Tani, i përket gjykatës Kushtetuese në Maqedoninë e Veriut që ta vlerësojë. Por duhet ta sqarojmë një gjë, nuk ka në Maqedoni të Veriut ligj për përdorimin e gjuhës shqipe dhe nuk ka patur as në të kaluarën. Ekziston ligji për përdorimin e gjuhëve që e përmend shifrën 20%. Po ai nuk është ligj për përdorimin e gjuhës shqipe, por përdorimin e gjuhëve. Duhet të presim një vendim të drejtë të Gjykatës Kushtetuese atje i cili nuk bënë as përjashtime as diskriminim dhe i cili e respekton shumë gjuhësinë që ekziston ku nuk e flasin të gjithë popullsia të njëjtën gjuhë ”, ka thënë ai në një konferencë të përbashkët me kryeministrin e Maqedonisë së Veriut, Hristijan Mickoski.
Për Ligjin për gjuhët, Gjykata Kushtetuese e Maqedonisë së Veriut pritet të vendosë në dhjetor të këtij viti./teve1.info/
