Kryeministri i Kosovës, Albin Kurti, ka pritur në takim Shefen në Detyrë të Zyrës së Bashkimit Evropian në Kosovë, Eva Palatova, nga e cila ka pranuar raportin përfundimtar të Misionit të Ekspertëve Zgjedhorë të BE-së për zgjedhjet e fundit lokale dhe parlamentare.
Sipas njoftimit nga Zyra e Kryeministrit, gjatë takimit u diskutua për procesin zgjedhor të 28 dhjetorit, i cili vlerësohet se ka dëshmuar edhe një herë se Kosova organizon zgjedhje të lira, të drejta dhe në përputhje me standardet evropiane.
Kurti ka vlerësuar angazhimin e misionit dhe ka shprehur gatishmërinë e Qeverisë për të zbatuar rekomandimet e dhëna në raport.
Ai ka theksuar gjithashtu nevojën për një qasje proaktive ndaj dezinformimit dhe ndërhyrjeve të huaja në informacion.
Sipas tij, lajmet e rreme, sondazhet e fabrikuara, deklaratat e paverifikuara dhe materialet e manipuluara vizualisht kanë qenë format më të shpeshta të dezinformimit, me potencial për të ndikuar perceptimin publik dhe besimin në procesin zgjedhor.
Në njoftim theksohet se zgjedhjet e lira dhe të ndershme përbëjnë thelbin e Grupit të Parë të kapitujve të negociatave me Bashkimi Evropian, si dhe të kritereve politike të Kopenhagës.
Sipas Kurtit, përmes organizimit të zgjedhjeve të lira dhe të ndershme, Kosova i ka përmbushur këto kritere në mënyrë të vazhdueshme dhe të verifikueshme.
Në këtë drejtim, kryeministri ka kërkuar që gjetjet pozitive të misionit të reflektohen qartë edhe në raportin e vendit të Komisioni Evropian për vitin 2026./teve1.info/
