Është një ndër çështjet që u diskutua shumë.
Shtetet e Bashkuara veçse i kanë kërkuar Kosovës të bëhet pjesë e projektit rajonal për gazin amerikan.
E tani, planet për furnizim siç duket po shqyrtohen.
Veçse një gjë e tillë, po synohet të bëhet përmes termocentralit të Vlorës, e jo me gazsjellës.
I shkurtër në këtë deklarim ishte këtë të mërkurë kryeministri në detyrë, Albin Kurti.
“Po shqyrtojmë mundësinë për të përdorur gazin e lëngëzuar nga Shtetet e Bashkuara të Amerikës përmes bashkëpunimit me Shqipërinë në termocentralin e Vlorës”, ka thënë Kurti.
Këtë koment ai e bëri gjatë një vizite në Kramovik të Rahovecit.
Atje, Kurti qe i pranishëm në ceremoninë e vendosjes së gurthemelit për ndërtimin e parkut solar.
S’vonoi shumë e shiriti u pre.
Kurti tha se ky park ka kapacitet prej 105 megavatësh.
“Falënderoj qeverinë e SHBA-ve për mbështetjen në përgatitjen dhe dizajnimin e ankandit të parë solar. Ekspertiza e tyre ka ndihmuar që procesi të zhvillohet mbi praktikat më të mira ndërkombëtare dhe të krijojë besim te investitorët”, ka thënë tutje Kurti.
Se sa është i rëndësishëm është ky projekt për ekonominë kosovare, tregoi ministrja në detyrë e Ekonomisë, Artanë Rizvanolli.
“Çfarë kemi arritur më shumë se gjithçka, më shumë se çmimi konkurrues, më shumë se megavatët që do të shtohen, është që kemi dëshmuar se Kosova mund të zhvillojë projekte të mëdha sipas standardeve ndërkombëtare, praktikave më të mira, të tërheqë kapital, teknologji e kompani serioze”, u shpreh Rizvanolli.
Disa detaje i dha edhe kryetari i Rahovecit.
“Investimi shtrihet në Guri të Kuq dhe Kramovik, ndërsa përmes Kuvendit të Komunës së Rahovecit kemi vënë në shfrytëzim një pronë komunale diku rreth 2 hektarë. Po ashtu, në bashkëpunim me Agjencinë Pyjore të Kosovës, është realizuar edhe bartja e gjithsej 112.56 hektarëve tokë për shfrytëzim”, theksoj Latifi.
Ashtu siç u bë e ditur, ky projekt është mundësuar nga një kompani nga Rahoveci, por me lokacion në Zvicër.
Për fund, Kurti u pyet nga gazetarët edhe për takimet e reja për formimin e institucioneve, por për këtë, nuk pati një përgjigje.
